Кондак 1 гл. 8.

     Избранный пастырю Христова стада и сосуде достойный Божия благодати, веры Православный поборниче, от безбожников даже до смерти пострадавый, песньми велегласно восхваляем тя, свето­зарный отче наш Владимире, ты же, дерзновение ко Господу имый, на стезю спасения настави нас, благочестною любовию поющих ти: радуйся, Владимире, негасимый Православия светильниче!

Икос 1

     Ангельскою любовию ко Господу горевый и измлада нрав твой долготерпелив и кроток показавый, миру Православному христиа­нин всесовершен явился еси, исповедниче Христов Владимире. Днесь же Трисвятую песнь на Небесех со ангельскими чинми воспеваяй, недостойных нас услыши на земли, со слезами умиления взывающих:

Радуйся, благочестивых родителей преславное рождение;

Радуйся, благое и богодуховенное тех воспитание.

Радуйся, от юности Христу служити возжелавый;

Радуйся, нелицемерную по Бозе ревность показавый.

Радуйся, благоутробия Христова подражателю;

Радуйся, Евангельскаго слова благовествователю.

Радуйся, блистание Божественнаго света;

Радуйся, сияние Небесныя благодати. Радуйся, души верных просвещаяй;

Радуйся, сердца ищущих правды Божией озаряяй.

Радуйся, человече Небесный;

Радуйся, ангеле земный.

Радуйся, Владимире, негасимый Православия светильниче! 

Кондак 2

     Видя и разумевая во всяцей скорби и напасти ко спасению душ наших наставление, не уны и не отчаяся, святый Владимире, егда лишился еси сына отрока и любезныя твоея супруги. Но терпеливно скорбь сию подъял еси и утешение в монашестве обрел еси, стопы своя к единому служению Христову направляяй. Сподоби же и нас во всех бедах Благоподателя святую волю разумети, не противлятися спасительному Промыслу Его, но присно славити за вся Творца и Бога: Аллилуйя!

Икос 2

          Разум Всевышний приосени тя, пастырю всехвальный наш Вла­димире, егда избра тебе Господь во епископа святыя Церкве Православныя, во еже день и нощь пещися ти о агнцех Божиих, да ни един убо от них погибнет. Ты же, яко послушник трудолюбный, пастырское делание смиренномудренно творил оси. Тако и ныне, во обителех Небесных пребываяй, наставник неусыпный буди нам, на тя надеющимся и глаголющим из глубины сердечныя:

Радуйся, вся красная и сладкая мира сего презревый;

Радуйся, от тленных на нетленная очи духовныя обративый.

Радуйся, епископство яко великий дар Господень восприявый;

Радуйся, обильно в хиротонии благословение Небесное стяжавый.

Радуйся, надежный ко спасению путеводителю;

Радуйся, заблуждших неустанный вразумителю.

Радуйся, мудрых века сего мудрейший;

Радуйся, рабе Христов добрейший.

Радуйся, иерарше славный, со святыми почиваяй;

Радуйся, молитв твоих покровом паству присно соблюдаяй.

Радуйся, неусыпаемый в бедах помощниче;

Радуйся, благий о нас печальниче.

Радуйся, Владимире, негасимый Православия светильниче!

Кондак 3

      Силою Всевышняго незримо укрепляемь, истинное мужество явил еси, преблаженне пастырю Владимире, егда спасал еси от глада и от мора твоя страдающая чада. Зря окрест, яко мнози уморяхуся, и не смутися, но Крестом Животворящим и Честным вооружився, прехождаше посреде людей самарских, помощь по­дая, печали утоляя. Такоже и нам, духовным гладом истощаемым и недугом маловерия одержимым, помози предстательством твоим ко Господу, прославляемому присно: Аллилуйя!

Икос 3

Имеяй выну попечение о чадех Божиих, сия отечески к бого­угодней жизни направлял еси, постом, молитвою и праведными делы/ предивный подвиг в подражание святым Христовым показавый. Твоя же пастырския добродетели хваляще, тя ублажаем, Боголюбче, сице:

Радуйся, благоутробия великаго сокровище*;

Радуйся, Божественнаго Промышления о нас приятелище.

Радуйся, Святыя Церкве Православныя украшение;

Радуйся, о чадех твоих теплое моление.

Радуйся, о мире паствы твоея рачителю;

Радуйся, от всяких бед усердный наш хранителю.

Радуйся, покрове, на пути спасения нас осеняяй;

Радуйся, столпе огневидный, во тьме неведения нас просвещаяй.

Радуйся, яко корение смущений трудолюбно исторгал еси;

Радуйся, яко терние неверия глаголом попалял еси.

Радуйся, архиерею Божий, Пастыреначальником Христом про­славленный;

Радуйся, иерарше Христов, дары Духа Святаго преисполненный.

Радуйся, Владимире, негасимый Православия светильниче! 

* хранилище 

Кондак 4. 

      Бурю велию прещений вражиих отврати от нас молитвами твоими, всеусердный Господа служителю Владимире, и буди нам и ограждение необоримое, яко в животе твоем защититель безмездный был еси всем Царю Небесному поющим: Аллилуия! 

Икос 4. 

     Слыша и видя множество напастей мира сего, сам болезнь и тяготы терпя, николиже ближния и други забывал еси, отче милосердне наш Владимире, но отеческими попечении всем помогая, ни едино же прошение нуждающихся презрел еси. Научи и нас друг друга тяготы носити, воспевающия тя и прославляющия сице:

Радуйся, любовию Божественною горяй;

Радуйся, за други своя душу не щадяй.

Радуйся, яко многи скорби и труды подъял еси;

Радуйся, яко вся ради Возлюбльшаго тя претерпел еси.

Радуйся, вдовиц и сирых щедрейший питателю;

Радуйся, гонимых и обидимых предстателю.

Радуйся, скорбящих сострадателю;

Радуйся, просящим милости подателю.

Радуйся, чаше, елей милости Божия к нам содержащая;

Радуйся, горо, тучи гнева Господня от нас отводящая.

Радуйся, и по преставлении твоем с нами пребываеши;

Радуйся, яко в селениих Небесных почивая, нас не оставляеши.

Радуйся, Владимире, негасимый Православия светильниче!

Кондак 5

     Боготечная звезда явился еси миру и светильник теплый людем православным, всероссийский архипастырю Владимире, иже пастыреначальник в триех стольных градех русских бывый, и наипаче же о обличении расколов порадевый, во еже нераздран хитон Христов нешвенный сохранити. Таковому о тебе произволению Господню радующеся, воспеваем Ему: Аллилуйя!

Икос 5

     Видя тя в селениих Небесных, зело радуется святый равноапо­стольный Владимир, имже возсия нам свет Христовы Истины, зане и ты Божественною волею в богохранимем граде Киеве просла­вился еси, страдальчествуя за Христа во дни великих испытаний. Тако и мы, блаженне, ликовствуем о тебе:

Радуйся, крестителя Руси достойный соименниче;

Радуйся, того неленостный споспешниче.

Радуйся, в стране Российстей боголучно возсиявый;

Радуйся, паству всероссийскую духовно удобрявый.

Радуйся, богоугодно на земли поживый;

Радуйся, любовию Божественною страх смертный победивый.

Радуйся, священномучениче, за Христову веру пострадавый;

Радуйся, страдальче, дух твой в руце Господу предавый.

Радуйся, смерть вкусивый, тления не знаяй;

Радуйся, с Печерскими отцы во святых пещерах почиваяй.

Радуйся, обители преславней украшение;

Радуйся, монашествующих в ней утешение.

Радуйся, Владимире, негасимый Православия светильниче!

Кондак 6

Проповедниче усердный слова Божия, Владимире, многомуд­рыми вещании твоими лжеучения безбожных обличал еси, от прель­щений душепагубных Христова чада сохраняя. Темже удостоился еси непрестанных славословий на земли, воспеваяй в Вышних Бо­гу: Аллилуйя!

Икос 6

Возсиял еси в отечестве своем, исповедниче Христов Владими­ре, яко новое светило на небесней тверди, сиянием подвигов тво­их тьму нечестия разгоняяй и мир Православный ублажати тя сице подвизаяй:

Радуйся, крепкая вайе древа правоверия;

Радуйся, богоизбранный посрамителю неверия.

Радуйся, Евангельское слово, яко меч духовный, возлюбивый;

Радуйся, от стрел лукаваго щитом веры ся оградивый.

Радуйся, усты многомудрыми Божественныя истины вещаяй;

Радуйся, пред Богом заступление нам крепкое являяй.

Радуйся, свеще, молитвенным огнем за нас горящая;

Радуйся, драгое миро, в храме Божием благоухающее.

Радуйся, даров Небесных неоскудное вместилище;

Радуйся, Божественныя мудрости хранилище.

Радуйся, крепкое падающих возведение;

Радуйся, стоящих право утверждение.

Радуйся, Владимире, негасимый Православия светильниче!

Кондак 7

     Хотяй прославити тя верою необоримою, даде узрети ти Вла­дыка наш Господь, како безбожницы в обители Печерстей, яко во аде бесы, бесновашася, безстудие творяще и древния святыни оскверняюще. Но сих прещений вражиих не убоявся, богоизбранный отче наш Владимире, Заступнику Единому от всяких зол усердная моления вознесл еси, взывая неослабне Богу: Аллилуйя!

Икос 7

    Новый образ милосердия явися нам, мучениче и святителю Вла­димире, егда пред кончиною благословил еси мучители твоя. Та­ковому твоему незлобию дивящеся и в тебе неизреченну славу Че­ловеколюбца зряще, славословим тя и восхваляем сице:

Радуйся, милосердия Небеснаго зерцало;

Радуйся, Христовы Церкве твердое забрало.

Радуйся, прерадостное наше утешение;

Радуйся, лукавым силам устрашение.

Радуйся, молитися за недруги учивый;

Радуйся, и сам мучители своя простивый.

Радуйся, яко тобою безумнии глумителие посрамляются;

Радуйся, яко тобою сила Божия является.

Радуйся, иже всечестно почитаемь на земли;

Радуйся, иже венцем нетленным украшен на Небеси.

Радуйся, яко с преподобными отцы во веки пребываеши;

Радуйся, яко отечество наше купно с теми защищавши.

Радуйся, Владимире, негасимый Православия светильниче!

Кондак 8

    Страннолепен и великоименит, исповедниче Христов Владими­ре, яко радетель неусыпный о Господнем Доме был еси, молитвы и труды твоя на благоустроение храмов направляя. О чиннем же богослужении и доброгласнем пении ревнуя, награду велию у Гос­пода снискал еси, в Небесных вертоградех ангелы пет быти. Мы убо зряще ныне храмов разорение и лепоты церковныя оскуде­ние, к тебе взываем: помози воздвигнути святыя храмы в душах наших и добродетельми их украшати, с тобою купно воспевающе Благоподателю и Жизнодавцу: Аллилуйя!

Икос 8

     Всея земли Российския архипастырю, иже из новомучеников

первый пострада во время лютое гонений на православных христи­ан, зовем тя, благодать стяжавшаго молитися за мир: не премолчи о нас, к священней твоей раце припадающих и во умилении поющих песнь тебе:

Радуйся, крест свой на рамена, яко Христос, подъявый;

Радуйся, стезю страданий за Него избравый.

Радуйся, мудрейший странниче, иский отечества Небеснаго;

Радуйся, угодниче Христов, презревый вся земная.

Радуйся, Дому Божию надежный стражу и хранителю;

Радуйся, иереев юных добрый попечителю.

Радуйся, кающихся с Богом примирителю;

Радуйся, Спасителя возлюбльших покровителю.

Радуйся, достойный ангелов собеседниче;

Радуйся, апостолом Христовым сопрестольниче.

Радуйся, благоприятную ко Господу молитву возсылаяй;

Радуйся, теплою молитвою твоею державу нашу согреваяй.

Радуйся, Владимире, негасимый Православия светильниче!

Кондак 9

    Вси чини ангельстии и святителей лик удивишася, зряще тя, Владимире, новаго мученика, в пострадавшей и поруганней земли Российстей просиявшаго. Мы же ныне прославляюще подвиг твой, ко Господу и Спасу нашему взываем: Аллилуйя!

Икос 9

    Ветия богомудрый Церкве Православныя и доблий воин Хри­стов был еси, священномучениче препрославленный Владимире. Имеяй сердце мягко, аки воск, но волю тверду, аки адамант, не гнулся еси семо и овамо ниже пред властию людскою, ниже пред обстоянии мирскими, и сего ради поношения приял еси. Верность же Господу Единому хранивый выну, услыши ныне песнь побед­ную сию:

Радуйся, воине Христов непобедимый;

Радуйся, в терпении твердейший адаманте невредимый.

Радуйся, яко неблагомыслящих наветы претерпел еси;

Радуйся, яко от яростивых поношения приял еси.

Радуйся, сердец смятенных умирителю;

Радуйся, от озлобления на нас враждующих хранителю.

Радуйся, духовных совершенств высоте;

Радуйся, смирения христианскаго глубине.

Радуйся, российских мучеников удобрение;

Радуйся, архиереев православных похваление.

Радуйся, яко от неверия избавляеши;

Радуйся, яко от малодушия исцеляеши.

Радуйся, Владимире, негасимый Православия светильниче!

Кондак 10

    Спасительнаго Промысла о нас сияние явися нам, егда стра­дальческую смерть приял еси, священнопроповедниче Владимире, ты бо искупительная жертва был еси во очищение людей право­славных, отступлением от веры согрешивших. Мы же ныне со­крушенным сердцем со слезами о спасении страны Российския мо­ляще, к Судии Благоутробному взываем: Аллилуйя!

Икос 10

    Стено и ограждение державы нашея, святителю Владимире, радетель неустанный о уставех православных был еси. Сохрани и ныне нас от пагубныя ереси, огради от раздирания Церквей, упа­си от соблазнения лжеученьми, да пребудем в лоне Церкве Истинныя. Твоего же ради заступления неустанно вопием ти сице:

Радуйся, Православия неблазненный ревнителю;

Радуйся, шатания Церквей искоренителю.

Радуйся, церковных таинств благочестный совершителю;

Радуйся, в Небесный Иерусалим путеводителю.

Радуйся, мечу, раскол и ересь посецаяй;

Радуйся, небесный громе, гордых устрашаяй.

Радуйся, Евангельскаго света чудное блистание;

Радуйся, за правду поносимых упование.

Радуйся, Господню волю сотворивый;

Радуйся, Христовы заповеди сохранивый.

Радуйся, яко честную кровь за веру пролиял еси;

Радуйся, яко блаженство неотъятное стяжал еси.

Радуйся, Владимире, негасимый Православия светильниче!

Кондак 11

    Пение похвальное, еже приносим ти, богоблагодатный пасты­рю Владимире, несть довольно восхвалити яко подобает тя, благочестное вместилище Святаго Духа, но всехвальных ради доброде­телей твоих вопием ти: моли Господа о нас, студными грехми окалявшихся, да низпослет чудеса неизреченныя Своея милости на нас, с тобою вкупе днесь поющих Ему: Аллилуйя!

Икос 11

    Светодательная свеща явился еси нам, исповедниче Христов и пастырю святый Владимире, разгоняяй нощь нечестия и освещали путь во тьме ходящих. Ныне убо умоляти не престай Христа Спаса и Владыку нашего, да не даст нам уклонитися стези, ко спасению нас грешных приводящия, но сподобит нас во Царствии Своем тя со ангелы святыми воспевати:

Радуйся, несокрушенный щите, защищаяй благочестие;

Радуйся, мечу победный, посецаяй злочестие.

Радуйся, блуждающих в духовном мраце окормителю;

Радуйся, честнейший преподобия хранителю.

Радуйся, светильниче Господень, Церковь озаряяй;

Радуйся, молящихся ти души умиряяй.

Радуйся, яко недугующих исцеляеши;

Радуйся, яко окамененных сердцем оживляеши.

Радуйся, печальниче болящим и безпомощным;

Радуйся, заступниче убогим и обидимым.

Радуйся, яко помраченных просвещаеши;

Радуйся, яко просвещенных утверждаеши.

Радуйся, Владимире, негасимый Православия светильниче!

Кондак 12

    Благодать дадеся ти от Бога, отче приснославимый Владимире, во еже быти нерушиму каменю Христовы Церкве. Твоему же об­разу желающе всем сердцем подражати, умоляем тя, блаженне, непрестанно: заступи, да не прельстят нас чудеса, силою лукаваго творимая, ниже лжепророцы соблазнят. Но в единомыслии и пра­воверии вся Христианы сохрани, прославляющия Бога Истиннаго: Аллилуйя!

Икос 12

    Поем праведное житие твое, восхваляем пречестное твое имя, почитаем за Христа страдания твоя, удивляемся духовней твоей крепости, радуемся славному обретению мощей твоих, новомучениче пресвятый Владимире, и любовию, воспоминающе о подвизех твоих, восписуем ти хваления сия:

Радуйся, победоносною светлостию облеченный;

Радуйся, святительскому лику сопричтенный.

Радуйся, поспешниче усердный ада Разрушителя;

Радуйся, последователю верный распятаго Учителя.

Радуйся, за веру и отечество живот свой положивый;

Радуйся, архиерею добрый, Богу Человеколюбцу угодивый.

Радуйся, яко живот твой непорочен сохранивый;

Радуйся, яко до смерти верен Господу пребывый.

Радуйся, венцем победным паче звезд на небеси блистаяй;

Радуйся, тимпане сладкозвучный, славу Божию бряцаяй.

Радуйся, во отечестве Небеснем ныне пребываяй;

Радуйся, и о земнем отечестве твоем не забываяй.

Радуйся, Владимире, негасимый Православия светильниче!

Кондак 13

     О страдальче многосветлый и святителю Христов Владимире! Приими малое хваление сие, в простоте сердечней* возносимое. Вонми гласу недостойному молящихся тебе и твоими скорыми ко Господу прошении умоли Его пробавити благоутробие Свое на ны, да сподобимся в блаженней радости воспевати Ему славу: Аллилу­йя!

Сей кондак чтется трижды, посем 1-й икос и 1-й кондак.

* искренне, от чистого сердца